Pauli Saijets, stuđeren 2018-2020

Jagi alimus boddu lei giđđakonsearta Anáris Sajosis. Lei gal somá čuojahettiin olbmot dánsugohte. Dovdu lei fiinnis! Earáge fiinna bottut ledje. Ovdamearkan guosseoahpaheaddjit dego Niillas Holmberg, Wimme Saari ja Teho Majamäki ja juoigit dahke váikkuhusa. Ovddit čuojahanvásáhus mus ii olus lean. Muhtumin gitára lea figgan čuojahit dego viđa jagi gaskkaid 20 sekundda háválassii. Lei somá fuobmát, ahte vaikke ii mihkkige instrumeanttaid lean munnje ovddežis oahpis, de movttiidin olu basso čuojaheamis.

Ruovttoluottafárrejeaddji

Lean ruovttoluottafárrejeaddjin fuobmán, mo eará sajis deike fárren olbmot leat beroštišgoahtán iežaset ruohttasiin. Ovdamearkan Sámi oahpahusguovddážis, oahpuid suorggis fuolatkeahttá, olbmot leat beroštišgoahtán guorahallat ruohttasiiddiset ja oahpásmuvvan dan bokte earret eará árbevirolaš musihkkii. Musihkkaakademiijas oažžu čiekŋalut oahpahusa namalassii musihkkii. Oalle máŋgasis árbevirolaš sámemusihkka lea vajálduvvan dahje vajáldahtton iešdáhtus. Miellagovva, ahte juoigan livččii heivemeahttun dahje suddu, eallá muhtumiin ain otná beaivvege. Leage fiinnis, ahte jurddaguottut molsojuvvojit ja dan ovdii bargojuvvo. Juoigan lea sámemusihkka, mii lea musihkka dego earáge musihkka: dat lea musihkka vaikkoba kirkomusihka dahje sálmmaid ektui. Dan sáhttá buktit ovdan juohke sajis. Musihkkaakademiija lea earenoamáš buorre báiki árbevirolaš musihka nanosmahttimii. Dat lea okta skuvlla deháleamos doaimmain.

Heahkastupmi soga musihkkaárbevierus

Álggos navden, ahte luohti ii min sogas gávdno. Nu das geavaige ja dássážii dat ii leat gávdnon. Dan sadjái gávdnui juoga eará. Áhkku vuohppi lei dahkan sutnje livđe. Lassin maiddái áhku áhčisge lei livđe. Min oahpaheaddjis Marko Joustes ledje arkiivabáttit su dutkamušaide ja justa doppe gávdnuige dát livđe. Go bessen sisa čiekŋalebbui áššái de čielggai, ahte mu eanu ja muottá muitiba áhku livđe. Árbevierru ii leange boatkanan.

Návccat ja mokta gávdno

Hállu dahkat musihka ja oahpahallat lasi lea lassánan dán mielde. Návccat ja mokta gal gávdnojit, vaikke vuosttas jagi ledje maiddái hástalusat vuodjumis ja fártii beassamis. Beroštahtti áššit leat nu olu. Lean ohcan nuppi jahkái solistalinnjái, mii álgá čakčat. Ovdamearkan prográmma plánen gullá oahpuid ja olu dahkko eanaš iehčanassii. Jáhkán, ahte lean musihkain dahkamušain boahttevuođas dál go mus lea dasa vuođđu vuosttas jagi oahpuid maŋŋá. Háliidan ávkkástallat daid oahpuid ja hárjehallat. Juoga dás vel šaddá, vaikke in dieđe goas. Dan galggašii várra ieš dušše mearridit!


Sámi musihkkaakademiija stuđeantamuitalusat