Modearna sámemusihkka

Nils-Aslak Valkeapää Joikuja-skearru álggahii ođđa áigodaga ja lei vuođđun oppa sámemusihka nuppástussii – ii dušše Suomas muhto olles Sámis.

“Ođđa juoigan”

Sápmelaš modeardna musihka sáhttá dadjat álgán ovtta dihto skearrus. Vuosttas sápmelaš populára- ja modeardna musihka skearru ilmmai jagi 1969.

Nils-Aslak Valkeapää Joikuja (OT-LP50) lei vuosttas skearru mas ovttastahtte čuojahanmieđusteami ja árbevirolaš juoigama: Skearrus Áillohačča juoigama mieđuštii gitarista. Áillohaš gohčodii ođđa musihkkastiila namain “ođđa juoigan”. Áillohačča luottaid čuovui vuosttažettiin Deatnogátte Nuoraid joavku, man vuosttas skearrus (MAI7402) lei sin iežaset luđiid ja lávlagiid lassin mielde maiddái muhtun Áillohačča árabut almmustahttán luođit.

Árvvusatnojuvvon árbevierru

Árbevirolaš juoigan ja eará árbevirolaš sámemusihkkašlájat leat seailluhan dehálaš mearkkašumis sámekultuvrras vaikke ođđa musihkkastiillat leatge váldán saji otná beaivve. Áillohaš ieš háliidii deattuhit luođi mearkkašumi ja barggaige eallimisttis áigge viššalit juoiganárbevieru seailluheami beales.

Máŋggabealát sámemusihka

Árbevirolaš sápmelaš musihka árvvusatnimis sáhttá máinnašit ovdamearkan Sámi Grand Prix –lávlungilvvu, mas leat iežas luohkát mieđuškeahtes árbemusihkkii ja modeardna sámemusihkkii. Ná beassat jahkásaččat gullat maiddái ođđa árbevirolaš  sámemusihka. Áillohačča álggahan sámemusihka ođasteapmi lea buktán buriid bohtosiid, dán beaivve sámemusihkka lea máŋggabealat. Genriin gávdnojit: pop- ja rock-musihkka, heavy metal, dánsamusihkka, mánáidmusihkka, etno, rappa, vuoiŋŋalaš musihkka… Sápmelaš musihkka gullo rádios, skearruin, Spotifys, festiválain jna ja dat lea oassi sápmelaš árgabeaivvis.

 

Čálli: Annukka Hirvasvuopio-Laiti