Ovttasbarggus lassidoarjja easkka gárvvásmuvvan oahppiide

Beaivi luoitá jo Ohcejogas ja avástallá lohkanjagi loahpa lahkoneami Sámi musihkkaakademiijas. Borgemánus ávvudat gárvánan oahppiid Sámi musihkkaakademiija festiválas. Beaivvi váldonásttit leat Sámi musihkkaakademiija oahppit, geat festivála konsearttain loaiddastit solo-prográmmaid ovttas ámmátmusihkkáriin. Spesiálaguossit festiválii bohtet Gaska-Bađaeatnama konservatoriijas. Álbmotmusihka lektor Pasi Porvari Gaska-Bađaeatnama konservatoriijas lea mielas ovttasbarggus. “Jurdageamet oahpuid mihttomeriin manne álggu rájes oktii."

Gaska-Bađaeatnama konservatoriija lea ođđa ovttasbargoguoibmi Akademiijai. Farga gárvvásmuvvan oahppit Anna Morottaja, Anna Lumikivi, Heli Aikio ja Laura Tapiola leat loahppakonseartta oktavuođas čađaheamen čájehandutkosa konservatoriijai. Oahpaheaddji Anna Näkkäläjärvi-Länsman lea duhtavaš oahppolágádusaid gaskasaš doibmii ja nisttiide, maid guoibmevuohta konservatoriijain addá.”Gaska-Bađaeatnama konservatoriija mielde oahppit ožžot riikkaviidosaš duođaštusa nuppi dási musihkkára dutkosis. Dat lea nana duođaštus musihkkasuorggis. Sáhka lea ođđalágan ovttasbarggus ja dál vuosttas geardde duođaštusas lohká váldoávnnasin sámi musihkkašlájat. Dát dieđusge dalle go čájáhus lea dohkkehuvvon!”, čaimmiha Näkkäläjärvi-Länsman.

Loahppakonsertii boahtán lávdegoddi árvvoštallá oahppiid guovdu bargodoaimma plánema, ollašuhttima ja musihkkáriin doaibmama. Musihkkaprográmmadaga gárvvisteami čájáhus čađahuvvo jo cuoŋománu áigge. Das oahppi heiveha juogo iežas bihtás dahje cover-bihtá iehčanasat, muhto musihkkaakademiija oahpaheaddjiid ja Gaska-Bađaeatnama konservatoriija doarjagiin.

Loahppabarggut

Näkkäläjärvi-Länsman šuohkiha jo čájáhusdutkosis, vaikke ráhkkaneapmi ja vehá vel bargu lea ain. “Fiinnis, ahte dát ollašuvvá. Sámi musihkkaakademiija čehppodat dovddastuvvo dán ovttasbarggu bokte”, gávnnaha Näkkäläjärvi-Länsman. Álbmotmusihka lektor Pasi Porvari Gaska-Bađaeatnama konservatoriijas lea maiddái mielas ovttasbarggus. “Jurdageamet oahpuid mihttomeriin manne álggu rájes oktii. Ovddit dutkosat ja bargovásáhus musihka suorggis ovttastahtton Sámi Musihkkaakademiija vuohkkasit dahkkon oahppopakeahtain leat addán oahppiide válmmašvuođaid nuppi dási čájáhusdutkosa čađaheapmái. Juohke oahppiin leat dáppe Kokkolas kárten čehppodaga (HOKS) mii lea jo, ja mii dievasmahtto giđa áigge. Ovttasbargu leamašan šattolaš ja sávan, ahte sámemusihka skuvlejupmi Ohcejogas joatkašuvvá”, dadjá Porvari.

”Ii bargu dahkkojuvvo duođaštusaiguin, muhto barggu ohcamis dain lea mearkkašupmi.”

Okta farga gárvvásmuvvan oahppiin lea Heli Aikio, geas lei álggu rájes plána dahkat čájáhusdutkosa. Dál son vuordá movttegis mielain boahttevaš festivála ja loahpalaš iskosa.

”Dagan musihkkára vuođđodutkosa Gaska-Bađaeatnama konservatoriijai, nuba borgemánu solokonsearta ja dan plánen leat oassi čájáhusas. Čájáhusdutkosii gullet sierra oassesuorggit, dego musihkkárin doaibman. Musihkkadahkkin maiddái komponeren gullá iežan čájáhussii. Lassin konservatoriija oahpuide gullá suvdilis ovdáneami kursa”, muitala Aikio. Oahppit dahket loahppakonsearttas aiddo iežas lágan, ja Aikios dat mearkkaša anárašgiela ja árbevieru gullon.

”Sámemusihkkaoahput oidnojit prográmmadaga gárvvisteamis, mas lean ovttastan livđeárbevieru ja iežan anárašgiela lávlagiid”, muitala Aikio boahttevaš konsearttastis.

Heli Aikio

 

Sáhkkiivuohta ja jeavddalaš ođđa oahppan gullá mihtilmasat musihkkasuorgái, iige bisáneapmái leat sadji. Giđđat gárvvásmuvvan oahppit áigot joatkit musihkkasuorggis juogo barggusteaset dahje freelancer-musihkkárin, dahje oassái goappáge. “Dán suorggis bargu ii dahku duođaštusaiguin, muhto barggu ohcamis dain lea mearkkašupmi. Sávvamis máŋgasat maiddái váldet joatkkaoahpuid. Iešge stuđeren olles áigge. Lean jeavddalaččat mielde Complete Vocal Institute skuvlejumiin”, muitala Näkkäläjärvi-Länsman.

Dárbu ámmátolbmuide

“Guovtti jagi skuvlejupmi lea easkka vuođđu nana ámmátdáidui, masa gal lea dárbu. Ámmátolbmot ja pedagogat dárbbašuvvojit boahttevuođas musihkkaoahpahusas ja oppalohkái Sámis. Ná sáhttit dorvvastit sámi musihkkašlájaid. Vaikke musihkkaakademiija boahttevuohta lea vel rabas, musihka ja dan oahpaheami dehálašvuohta ii rievdda ja jáhkán, ahte leat fáhten easkka moloža čeahpes musihkkáriin”, Näkkäläjärvi-Länsman loahpaha.


Loga maid