Festivála sirdojuvvo borgemánnui – Sámi musihkkaakademiijas hárjehallamin konsearttaide

-Lea dieđusge čielggas ahte eat sáhte dán dilis doallat festivála dál giđđat, muitaleaba prošeaktahoavda Kati Eriksen ja njunuš oahpaheaddji Anna Näkkäläjärvi-Länsman. Sámi musihkkaakademiija vuosttas festivála galggai lágiduvvot 16.5., muhto dál lea mearriduvvon ahte dat lágiduvvo borgemánu 29. beaivve. -Eat dieđe velá bessetgo olbmot searvat vai streamejuvvogo, muhto dán birra mii dieđihit dađistaga. Sihkar lea goittot dat, ahte festivála lágiduvvo, joatká Kati.

Festivála šaddá leat Sámi musihkkaakademiija prošeavtta loahppakonsearta. Korona dilis ledje stuorra váikkuhusat maid oahpahussii. -Dilli lea lasihan barggu oahpaheaddjiide ja streassa oahppiide, muhto geahččalit deattuhit daid positiivvalaš beliid, dálhan oahppiin lea eanet áigi ráhkkanit iežaset konsearttaide, Anna muitala. Son ja eará oahpaheaddjit leat šaddan váldit geavahussii ođđa oahpahanvugiid. – Lea leamašan buorre addit vokálaoahpahusa gáiddusin. Dat lasiha musihkkaoahpahusa vejolašvuođaid maiddái boahttevuođas, son joatká.

Sámi musihkkaakademiija ulbmilin lea šaddat lášmes, soddjilis ja máŋggabealat sámemusihkka skuvlejeaddjin, mii lágida sámemusihkka skuvlejumi heivehemiin earálágan skuvlenlinnjáid, dievasmahttinskuvlejumi ja oanehis kurssaid dárbbu mielde. Doaibma lea nannosit fierpmáiduvvan oppa sámis go dan guovddášbáiki lea Ohcejogas. – Min doaimma vuođđun lea árbevirolaš sámemusihkka, dan nannen ja ealáskahttin, dát boahtá leat maid Sámi musihkkaakemiija festivála váldodeaddun. Háliidit ahte Sámi musihkkaakademiija festivála šaddá jahkásaš festiválan, Anna ja Kati loahpaheaba.

Sámi musihkkaakademiija čohkke fierpmádaga mii seailluha, nanne ja ovddida sihke árbevirolaš ja modeardna sámi musihka birgenláhkin. Fierpmádaga doaibmit leat Sámi oahpahusguovddáš (Suopma), Sámi allaskuvla (Norga) ja Ohcejoga gielda (Suopma). Prošeavtta ruhtadit Interreg Davvi Sápmi, Lappi Lihttu, Sámi allaskuvlla, Davvekalohttaráđđi ja Ohcejoga gielda.