SAVE THE DATE Sámi musihkkaakademiija festivála 16.5. Ohcejogas!!!

Festivála váldoartisttat leat Sámi musihkkaakademiija studeanttat geat lávkejit lávdái iežaset soloprográmmaiguin ja ámmátmusihkkariiguin. Konsearttain gullojit sámegielat lávlagat sihke luođit ja livđet árbevirolaš hámis ja maiddái ovttas čuojanasaiguin.

Etnosápmi-konsearta Anáris – musihkkaakademiijai iežas luohti

Sotnabeaivve 17.11 musihkka ustibat čoahkkanedje Anára Sajosii. Sápmelaš musihkkaakademiija bođii gitta Ohcejogas ja buvttii guldaleaddjiide fiinnis Etnosápmi-konseartta man bagadalle Katri Kittilä ja Anna Näkkäläjärvi-Länsman. Vuosttamuš háve gulle dál maiddái musihkkaakademiija luođi. Luohti, man Anna Näkkäläjärvi-Länsman lea komponeren, čuojai maiddái ođđasit, encoren, go Sajosa guldaleaddjit eai máššan luoitit musihkkáriid eret lávddi alde.

Sámemusihkas diehtu golmma gillii

Sámi musihkkaakademiija neahttasiiddut doibmejit dál golmma gillii. -Lei dieđusge čielggas ahte siiddut bohtet sáme- ja suomagillii, muhto mii háliidit juohkit dieđu maid máilmmiviidosaččat, muitaleaba prošeaktajođiheaddji Kati Eriksen ja njunuš oahpaheaddji Anna Näkkäläjärvi-Länsman. -Prošeavtta ulbmilin lea ovddidit sámemusihka áigáiboahtun. Erenomážit olgoriikkalaš mátkkošteaddjit háliidit eanet ja eanet alladását, eakti vásáhusaid ja mii dađe buoret dalle go sámemusihka árbevirolaš ja modeardna hámit, Eriksen joatká.

EtnoSápmi fuusio Sajosii

Sámi musihkkaakademiija buktá Anára Sajosii ođđa biekkaid Etnosápmi-konseartta hámis. Árbevirolaš sámi musihkkašlájat ovttastuvvet etnomusihkain lávga oktiisuddamin, gos skádjet bossunčuojanasat, dávgečuojanasat ja olu eará. Jienas leat maiddái golbma sierra sámegiela. Prográmma lea plánen ja bagadan akademiija oahpaheaddji Anna Näkkäläjärvi-Länsman ovttas musihkkaoahpaheaddji-komponista Katri Kittiläin.

Oahpásmuva maid – Stuđeantamuitalusat